Тимур Дибиров кој е еден од најомилените ракометари на Вардар кај навивачите, во интервју за сајтот на руската ракометна федерација, ја отвори душата, и зборуваше за случувањата во „црвено-црниот“ табор откако финансиерот Сергеј Самсоненко најави дека по крајот на сезоната го напушта клубот.

– Сите се согласивме да играме до крај без разлика на проблемите. Карактерот и заедништвото се најголемата предност на овој тим. Имаме победнички менталитет и тоа ни донесе многу радости, и секако најголемата, триумфот во Лигата на шампионите – вели Дибиров во интервјуто.

Токму победничкиот карактер, беше можеби пресудниот момент, ракометарите да успеат да се вратат од бездната во реваншот со ПИК Сегед и на крајот да обезбедат пласман на фајнал фор турнирот во Келн.

– Искуството од вакви натпревари не натера воопшто да не паничиме на полувремето со ПИК Сегед иако губевме со осум голови. Знаевме дека ќе добиеме шанса, ја чекавме и кога ни се укажа, ја искористивме и еве пак ќе играме во Келн – потенцира крилото на Русија и на Вардар.

На крајот од сезоната, сите ракометари се слободни, веќе добиле исписници од клубот иако поранешниот финансиер Михајло Михајловски побара ракометарите да почекаат до 10 мај бидејќи е во преговори со неколку заинтересирани бизнисмени да вложат во Вардар.

– Јас се водам според официјалните информации. Пред првиот натпревар со ПИК Сегед, директорот на клубот ни кажа дека сите сме слободни по крајот на сезоната, сите имаме исписници во рацете и слободни сме да бараме нови клубови. Јас сè уште не сум се договорил со Мешков. Клубот достави понуда, но има најави за понуди од Германија и од други земји. Сè уште размислувам. Ќе ми недостасуваат Скопје и Македонија. Тука се роди ќерка ми, клубот е фантастичен како и навивачите. Скопје ми е втор дом, ние сме професионалци, но си заминувам со полно срце – потенцира Дибиров.