Дибиров: Дуелите меѓу Вардар и Киелце се ракометна класика, одиме на победа
Ракометарите на Вардар утре (18.45 часот) ги продолжуваат натпреварите во Лигата на шампионите и тоа по пауза од речиси еден месец. Ривал на „црвено-црните“ е полскиот Киелце кој е лидер во групата.
Дуелите помеѓу македонскиот и полскиот тим станаа редовни на „менито“ во Лигата на шампионите, а вардарци иако со реновиран тим во однос на минатата сезона, се уште е актуелни европски шампиони и одат на победа против Киелце.
Еден од најискуните ракометари на Вардар, Тимур Дибиров смета дека дуелите со Киелце станаа вистинска ракометна класика и верува дека мотивите за победа се високи иако тимот нема одиграно натпревар речиси еден месец.
– Натпреварите меѓу Вардар и Киелце веќе се како ракометна класика, затоа што многу е тензично, секогаш интересно, со неизвесен резултат. Очекуваме ист таков меч и тука во Скопје. Сега не се плашиме поради тоа што немавме натпревари повеќе време, затоа што тој со Фленсбург покажа дека нема многу голема разлика и дека можеме добро да се носиме со тоа. Киелце е екипа за која е многу тешко да се подготвите. Имаат многу креативни играчи, како Карачиќ, Душебаев, многу добри пикери, како Каралек и Турна, нормално имаат и одличен тренер. Знаеме дека ќе биде тешко, но нашата шанса е дома да прикажеме борба, да играме 60 минути и ќе видиме што ќе даде тоа. Верувам во нашата екипа, бидејќи ние губиме или победуваме, секогаш излегуваме на еден натпревар со самодоверба и знаеме дека секога имаме шанси да победиме. Очекувам и овој пат да биде исто – вели Дибиров.