Играчот на „црвено-црните“ во интервјуто за „handballfast.com“ говореше за состојбата во која се наоѓаше Вардар досега сезонава, кои беа причините за високите порази во елитното клупско ракометно натпреварување.

Моментно европскиот првак е на зимска „пауза“ поради репрезентативните обврски и подготовките кои се водат за настапот на Европското првенство 2020 наредниот месец.

Тимур Дибиров вели дека Вардар имаше тешка полусезона, повредите кај главните играчи го направија своето и тоа влијае(ше) врз резултатите во Лигата на шампионите.

– Стојанче Стоилов се опоравуваше долго време, потоа Павел Атман и Сергеј Горбок беа надвор од составот, а Глеб Калараш и Сергеј Горпишин имаа проблеми. Дојде и промената на тренерот (Давид Писонеро), така што се менуваше и стилот на играта. Сите ја очекувавме оваа пауза да се обидеме што може да се промени и поправи за пролетниот дел од сезоната. Јасно е дека имаше проблеми со селекцијата на играчите, дека се очекуваше повеќе од голманите – рече Дибиров.

Вели воедно дека е тешко да се заменат играчи како Карачиќ, Милосављев, Мораеш.

– Иако велат дека се подобрува финансиската состојба, јас не мислам така. Таа е уште полоша. Напролет клубот би можел да се соочи со сериозни кадровски проблеми. Со исклучок на тројца играчи, Сташ Скубе, Артурс Кугис и Павел Атман, на сите останати им истекуваат договорите. Во ваква ситуација нема смисла да се зборува за продолжување на нивната соработка и никој не започнал да преговара. Му доаѓаат тешки времиња на Вардар – додаде Дибиров.