Британскиот премиер Борис Џонсон и понатаму е на одделението за интензивна нега во стабилна состојба која се подобрува, изјави денеска министерот за култура Оливер Дауден.

– Кога станува збор за состојбата на премиер, исто е како што рековме и вчера. Состојбата е стабилна и се подобрува, рекол Дауден.

Џонсон е примен во болницата во Лондон во недела, 5 април, заради константната висока температура и кашлица, а наредниот ден бил префрлен на интензивна нега. Примил кислород, но не е приклучен на респиратор. Министерот за финансии, Риши Сунак рекол претходно дека премиерот седи исправено на креветот и комуницира со клиничкиот тим.

Џонсон е спречен да ги извршува премиерските должности во време кога земјата, според наводите на научниците, влегува во најинтензивната фаза на епидемијата.

Владата за неколку дена ќе ги преиспита мерките за ограничување на јавниот живот, заради кои поголемиот дел од економијата е запрен.