Холивудската глумица Џенифер Анистон во интервју за магазинот „Варајети“ проговори за негативното искуство со филмскиот могул Харви Вајнстин, со кого соработувала во 2005 година.

Откако „Њујоркер“ во 2017 година ја објави приказната за злоставување на глумиците од страна на Вајнстин, неговиот углед е на многу лош глас.

Џенифер Aнистон раскажала како Вајнстин ја натерал да носи фустан што го дизајнирала неговата сопруга Џорџина Чепмен.

„Таа година Џорџина Чепмен пушти нова линија облека. Харви ме посети во Лондон и ми рече: Сакам да го носиш овој фустан на премиерата на филмот. Тоа не беше мој стил и му реков дека не сакам, а тој ми рече дека морам“, раскажала Анистон.

Една непријатност со него доживеала и на вечерата по повод премиерата на филмот.
„На масата беа Клајв Овен и продуцентите, а јас седев до еден пријател. Тогаш дојде Вајнстин и му рече на мојот пријател да се тргне и седна до мене. Какво одвратно однесување, како прасе во кал, помислив тогаш“, раскажала глумицата.

Харви Вајнстин моментно се соочува со повеќе од 70 обвиненија за вознемирување и обиди за силување.