Претседавачот на Претседателството на Босна и Херцеговина, Шефик Џаферовиќ изјави дека против иницијативата таканречена мини Шенген можат да бидат „само некои неразумни луѓе“, пренесе „Oslobodjenje.ba“.

Тој рекол дека целта на неговата посета во Албанија е поттикнување на билатерална соработка меѓу БиХ и Албанија.

– Таа соработка неоправдано беше запоставена и не одговараше со можностите кои двете држави ги имаат, посебно кога економската сфера на билатералните односи се во прашање“, вели Џаферовиќ и додава дека бројните бизниси во кои двете држави можат да соработуваат се на „обострана корист“.

Тој додава дека БиХ ќе отвори амбасада во Тирана како што и Албанија ќе отвори во Сараево.

– Тоа се мостови на соработка. Затоа постојат дипломатско-конзуларни претставништва, рекол Џаферовиќ.

Зборувајќи за иницијативата таканаречена мини Шенген, Џаферовиќ истакнува како „треба да ги користиме сите регионални иницијативи“. 

– Кога станува збор за иницијативата која ја нарекуваат мини Шенген, тука на најдобар можен начин може да се реализираат оние четири слободи на кои е втемелена Европската унија – движење на роба, луѓе, капитал и услуги… Многу е важно една таква иницијатива да биде под закрила на ЕУ, сите да бидеме еднакви и партнери. Само некои неразумни луѓе можат да бидат против тоа нашите граѓани да можат да се движат со лична карта и нашите камиони да не стојат со денови на граници. На крај краишта, тоа води и до еден подобар живот на сите граѓани во регионот, заклучи Џаферовиќ.