Џафери: За измени во Законот за јазици потребна е согласност од помалите албански партии, кај нив нема расположение за тоа
Пратениците на ВМРО-ДПМНЕ имаат процедурална можност да поднесат предлог за измени на Законот за употреба на јазиците, но мора да имаат предвид дека тој закон е донесен со Бадентерово мнозинство, така што и предложените измени треба да се изгласаат со тоа мнозинство, изјави денеска спикерот Талат Џафери.
– Конечната одлука, дали Законот ќе се смени или не, е кај немнозинските пратеници од албанските партии. Предлагачот на измените треба да ја обезбеди нивната поддршка, а јас не верувам дека кај помалите албански партии во парламентот постои расположение за измена на Законот за употреба на јазиците – рече Џафери.
Според него, препораките на Венецијанската комисија не се обврзувачки.
– Укажувањата од Комисијата во делот на институциите, дека тие не се подготвени за имплементација на Законот, е проблем на институциите. Секоја институција мора да обезбеди соодветна инфраструктура за спроведување на законите кои ги носи Законодавниот дом – дециден е Џафери.