На судијата Осман Шабани кој го води предметот „Талит“ му бил доставен допис дека Илија Димовски поради службени обврски нема да може да присуствува на судењето, кое вчера беше одложено за 13 декември, пишува Плусинфо.

Дописот бил потпишан лично од претседателот на македонскиот Парламент, Талат Џафери, додека судијата го прозвал за неодговорност. Судијата Шабани дури се заканил дека нема повеќе да толерира такво однесување.

Инаку Димовски, како шеф на македонската делегација синоќа имаше средба во Сенатот на Француската република со Кристијан Камбон, претседател на Комисијата за надворешни работи, одбрана и вооружени сили на Сенатот, со Филип Ереира, генерален директор за политички и безбедносни прашања во француското МНР како и со други високи претставници на француската држава.

– Изненаден сум од реакцијата на судијата Осман Шабани, бидејќи тој е навремено известен за моите службени обврски. Прво, има добиено допис од страна на Собранието на Република Македонија со кој е известен за моите активности, како шеф на македонската делегација во ПС на НАТО овие неколку денови- изјавил пратеникот Димовски за Плусинфо.