Дезинфекција на училиштата во општина Карпош пред стартот на новата учебна година
Од утре ќе се врши дезинфекција на девет основни училишта на територијата на општина Карпош пред стартот на новата учебна година што е најавен за 1 октомври.
Минатата недела беше целосно дезинфицирано ООУ „Лазо Трповски” во Карпош 3, а утре дезинфекцијата ќе продолжи во ООУ „Петар Поп Арсов во Карпош 4, „Аврам Писевски” во Бардовци и „Христијан Тодоровски Карпош” во Карпош 1.
Во вторник ќе се дезинфицираат простории на училиштата „Јан Амос Коменски” во Тафталиџе 1 и „Братство” во Тафталиџе 2, во среда „Војдан Чернодрински“ кај Млечен, како и школото „Владо Тасевски” во Козле и „Вера Циривири Трена” во Карпош 2.
Од Општината денеска информираа дека планот е дезинфекцијата да заврши до четврток.
– Општина Карпош спроведува сеопфатна дезинфекција во предучилишните и училишните установи секои шест месеци во годината, а годинава имавме и вонредна дезинфекција во март поради состојбата со пандемијата. Интенција на локалната самоуправа е сите установи безбедно да ги пречекаат учениците во новата учебна година и да обезбеди здрави и хигенски услови за престој и работа, велат од Општината.