Четиригодишната Британка Тејлор Пауел фрлила порака во шише, во која ставила своја фотографија и број од телефонот на татко ѝ, сакајќи да открие каде ќе заврши шишето и дали некој ќе ѝ се јави.

„Ако ја пронајдете оваа фотографија, ве молам одговорете со своја фотографија и напишете од која земја сте“, напишала во пораката.

Дваесет дена откако шишето со пораката го фрлила во морето во Санта Сузана во близина на Барселона, татко ѝ Ричи добил порака од младиот пар Саша и Алекс, пишува британски Сан.

Напишале дека го пронашле шишето во московската река и испратиле фотографија со потпис „Од Русија со љубов“.

„Тејлор е воодушевена што шишето се појавило во Москва. За неа тоа е волшебно“, изјавил нејзиниот татко.

Стручњакот за океани, Адриан Њу, рекол дека е можно шишето да е пренесено преку немирното море околу Шпанија, покрај Шкотска, преку Балтикот и Русија, но патот би требало да трае многу подолго.