Деветмина писатели, издавачи, уредници од регионот и пошироко ќе бидат гости на 9. издание на Интернационалниот литературен фестивал „Про-За Балкан“, што ќе се одржи од 19 до 22 септември во Скопје. На годинашниот лауреат Мирча Картареску ќе му се придружат писателите: Јоана Николае, Анте Томиќ, Миљенко Јерговиќ, Оливера Ќорвезироска, Гојко Божовиќ и Калин Терзиски. Нивното севкупно творештво ќе биде претставено на отворањето на фестивалот, на 19 септември, во Даут-пашиниот амам.

Повеќекратно наградуваниот поет, есеист, литературен критичар, уредник и издавач од Белград, Гојко Божовиќ, заедно со хрватската издавачка и литературен агент Дијана Матулиќ и словенечкиот писател и уредник Андреј Хочевар, ќе бидат дел од програмата „Скопје фелоушип“. На вториот фестивалски ден, на 20 септември, тие ќе учествуваат на тркалезна маса на тема „Литературата во време на пост-вистината“ во „Еуропе хаус“ во Скопје.

На третата вечер ќе биде доделена наградата „Прозарт“ на лауреатот Картареску, а секој автор ќе прочита извадоци од своите дела. На 22 септември ќе се одржи дополнителна програма – „Александар Прокопиев за Гојко Божовиќ & Божовиќ и Прокопиев за Данило Киш“ во кафе-книжарницата „Буква“. Организатор на фестивалот е издавачката куќа „Прозарт медија“.

(Текстот е објавен во „Културен печат“ број 97, во печатеното издание на весникот „Слободен печат“ на 18-19 септември 2021)