Детската болница Козле стана ковид центар и забрзано се полни: За 16 часа примени 16 пациенти
Директорот на Институтот за белодробни заболувања кај децата „Козле“, Бесник Зекири, во изјава за „Слободен печат“ изјави дека од синоќа од 20 часот до утринава до 8 часот хоспитализирани се 16 пациенти со тешки симптоми на ковид-19.
– Од вчера Институтот за белодробни заболувања кај децата „Козле“ е пренаменет во ковид-центар и за првите 16 часа откако е ставен во употреба, односно до 8 часот утринава, примени се 16 пациенти. И во текот на денот имаме нови хоспитализации. Капацитетот на болницата е 50 кревети и се плашам дека може да се исполни брзо ако хоспитализацијата продолжи со вакво темпо – рече Зекири.
Во меѓувреме, децата на кои им е потребна хоспитализација се препраќаат во Универзитетска болница за детски болници на понатамошно лекување. Таму се упатуваат сите деца од Скопје и од другите градови кои имаат различна симптоматологија, значи не се однесува тоа само на ковид пациенти, нагласи Зекири.