Десетици илјади луѓе вчера излегоа во Берлин, во знак на протест поради постојаните зголемувања на кириите и недостигот од станови во германските градови.

На настанот присуствуваа „повеќе од 10.000 луѓе“, според податоците на полицијата, а според организаторите, бројката изнесувала 40.000 лица.

Протестантите поминаа низ неколку населби, каде што жителите беа принудени да ги напуштат своите станови поради високите кирии.

Демонстрантите носеа постери со слогани како „Имањето дом е фундаментално право“.

Помали демонстрации имаше и во Минхен, Келн и Дрезден. Организаторите на протестите рекоа дека имало настани во вкупно 19 градови со вкупно 55.000 учесници.

Во Берлин, организаторите почнаа да собираат потписи за референдум за експропријација на компаниите за недвижнини. Иницијаторите сакаат државата да преземе мерки против компании со над 3.000 домови.

Во случај на приватните компании, во 2013 година становите беа поскапи од општиниските во просек за 70 центи по метар квадратен, а во 2017 година тие беа 1.30 евра поскапи од општинските, според податоците на германскиот Институт за економија.

Според проценките на локалните власти во Берлин, купувањето на приватни станови ќе ја чини веќе задолжената покраина над 30 милијарди евра.