Десетина демонстрантки уапсени на протестите во Минск (ФОТО)
Десетина демонстрантки беа уапсени денеска на протестот во Минск на кого повторно бараа оставка од претседателот на Белорусија Александар Лукашенко, пренесува Бета.рс.
Стотина жени протестираа денеска во центарот на Минск, продолжувајќи го бранот на демонстрации против Лукашенко, започнати после претседателските избори на 9 август.
Организацијата за заштита на човечки права Вијасна соопшти дека полицијата го блокирала центарот на Минск и уапсила повеќе од 80 демонстрантки, пренесува Асошиејтед прес.
Полицијата бркала некои од уапсените по блиските згради, каде тие пробале да се сокријат, наведува Вијасна.
Белорусија е погодена од политичка криза од претседателските избори, кога низ земјата почнаа масовни антивладини протести, предизвикани од официјалните резултати на гласањето според кои Лукашенко освоил повеќе од 80 отсто од гласовите.
И покрај настојувањето на власта да ги задушат протестите со апсења и репресија над демонстрантите и активистите, нема знак дека демонстрациите се ближат до крајот.