Од денеска до недела на улицата „Македонија“ се одржува 15. манифестација „Денови на македонскиот мед” каде што можат да се вкусат и купат мед, прополис, полен и други производи од мед, поставени на штандови на 37 производители од целата земја.

Оваа година пчеларите се задоволни од сезоната и сметаат дека овие манифестации се добродојдени за да на граѓаните уште повеќе им се доближат благодетите од медот.

На една од тезгите се продава и медот на семејството Стојановски од Охрид кои имат дури 1.000 пчелни семејства.

– Во оваа гранка сме повеќе од 60 години, почнувајќи од мојот дедо, татко и јас и се надевам дека традицијата ќе продолжи понатаму. Ние сме професионално определени на пчеларството како гранка, па така произведуваме ливадски и шумски мед, а и сме еден од репроцентрите за пчелни роеви и матици. Ние како семејство учествуваме од самиот почекот на оваа манифестација и сме задволни од нашиот настап, затоа што заинтересираноста е голем во однос на потрошувачите, а со тоа и промоција на нашите производи – вели  Маријан Стојаноски од Охрид.

Стојановски се надева дека почесто ќе се одржуваат  слични манифестации за да се промовира македонскиот мед и производите од пчеларството, а со тоа и да се зголеми свеста на потрошувачите на вистински природен мед.

Оваа година манифестацијата се одржува под мотото „Конзумирајте пчелни производи за убав ден и здрав живот“, а пчеларското здружение „Матица“ од Скопје, кое е и организатор на настанот, оценува дека потрошувачката на мед се зголемува.

– Пчелараството добива на значење во последните години во цел свет, така што ОН прогласија Ден на пчелата, а се покренуваат иницијативи таа да се прогласи за најкорисен инсект. Се повеќе луѓе ги користат производите на пчелата во секојдневната исхрана, откако заклучија дека пчелата е навистина корисен инсект кој живее милиони години на нашата планета – вели Душан Ристески претседателот на пчеларското здружение „Матица“.

На штандовите на улица „Македонија“ можевме да забележиме производители на мед и медни производи од целата држава кои ги нудеа своите продукти.

[foogallery id=”91801″]