Наставниците кои држат настава со физичко присуство во основните училишта ширум земјава, од денеска станаа дел од приоритетната група на граѓани за вакцинација. 

Ова следува откако пред неколку денови претседателот на Самостојниот синдикат за образование и наука, Јаким Неделков, реагираше дека покрај негувателките во градинките и наставниците кои имаат непосреден контакт со учениците треба да бидат ставени во приоритетната група на граѓани за вакцинација.

„СОНК побара од ресорните министри и Владата, вработените во образованието, науката и културата да бидат приоритетни при вакцинирање против ковид-19“, се вели во реакцијата на Неделков.

Како што дознава „Слободен печат“, наставниците кои држат настава со физичко присуство ќе се вакцинираат од денеска па се до петок.