Денеска е Меѓународниот ден на мачките, кој се одбележува од 2002 година, а е создаден со цел да се подигне свеста за мачките и начините како да им се помогне и да се заштитат, пишува „Индекс“.

Мачките отсекогаш биле околу нас и биле обожувани уште од древниот Египет. Можеби не сте знаеле, но на крајот на 19. век, египетски фармер открил гробница со илјадници мумифицирани тела на мачки. Пронајдени се дури 80 илјади мачки и мачиња, закопани 2000 години пред Христа.

Мачките се одлични миленици поради многу причини, а ние набројуваме неколку од нив подолу.

Тие не бараат премногу активност

Мачките се познати по тоа што многу спијат, но сепак им треба малку активност. Иако знаат да се забавуваат, понекогаш сакаат да си играат со својот сопственик. Во принцип, на мачките не им треба прошетка, но има сопственици кои се подготвени да ги научат на таа активност.

Тие се тивки

Дали ве нервира кога вашето куче ја буди цела куќа со лаење? Нема да го имате тој проблем со мачките. Дури и оние кои се гласни никогаш не мјаукаат доволно гласно за да направат сцена. Кога имате посетители, тие обично се повлекуваат и се кријат наместо да скокаат насекаде.

Можат да го поминат животот во затворен простор

Иако е подобро мачката да има можност да остане на отворено, доколку сакаат, оние кои живеат во такви услови можат да го поминат целиот свој живот внатре во куќата или станот.

Мачките се вистински ловци

Мачките се природни предатори. Инсектите, пчелите и пајаците немаат шанса против мачките. Мачките практично ги истребуваат штетниците од вашата куќа. Нема да имате проблеми со стаорци ако живеете со мачка. Ловот за мачка е игра.

Мачките се забавни и интуитивни

Мачките се забавни. Доказ за тоа се бројни снимки на социјалните мрежи кои љубителите на животните ги гледаат за да се опуштат и насмеат. Дефинитивно, мачките се поголеми ѕвезди од половина од луѓето на интернет. Мачките можат да почувствуваат кога сте вознемирени и неретко се обидуваат да ве утешат. Тие се многу емотивни животни кои сакаат да лежат во скут и да се гушкаат. Истражувањата докажаа дека галењето мачка позитивно влијае на луѓето.