Демонстранти денеска влегле во зоната за пристигнување на аеродромот во Хонг Конг, каде на посетителите им делеле флаери и истакнувале транспаренти на десет јазици, за туристите, воочи протестите планирани за викенд ширум градот, да се запознаат со ситуацијата во тој град и со своите барања.

„Ве молиме да ни простите. Дојдовте во скршен, разрушен град, а не во онаков каков што сте замислувале. Сепак, ние се бориме за овој Хонг Конг“, гласи една од пораките.

Раководството на аеродромот во Хонг Конг од порано денеска соопштило дека само на патниците кои заминуваат и на оние кои имаат пасоши ќе им биде дозволено да влезат во терминалот, откако демонстрантите најавиле тридневен протест.

Хонг Конг денеска се обидел да ги увери посетителите дека градот кој во 1997 година е вратен под кинеска власт е безбеден, откако неколку земји издадоа предопредување за безбедност во врска со протестите.