ДЕМНЕ ОПАСНА ИНФЕКЦИЈА: Зошто на бебињата не треба да им се дава мед?
Најчестото верување е дека медот во исхраната на бебињата се воведува доцна поради опасноста од алергии.
Иако медот е силен алерген, причината зошто не се препорачува во исхраната на бебињата е многу повеќе од тоа. Медот може да предизвика ботулизам, кој е опасна инфекција во цревниот тракт.
Медот е извор на спори кои може да ја создадат бактеријата Clostridium botulinum. Дигестивниот систем на бебињата е преслаб за да може да ја исфрли оваа бактерија, па таа може да остане во неговото тело и да предизвика низа нарушувања.
За среќа, многу бебиња успешно можат да се изборат со неа, но постојат и случаи кога оставила трајни последици, па дури и резултирала со смрт.
Најчести знаци на ботулизам се постојан запек, изостанување на рефлекси, мускулна слабост, изразена поспаност, отежнато дишење…
Поради тоа, медот се воведува најрано по првата година, а може и подоцна. Младите родители треба внимателно да ги следат упатствата на својот педијатар и ништо да не воведуваат на своја рака, за да не го доведат во опасност животот на своето бебе.