Знаменосецот на свечената церемонија на Олимписките игри во Токио, Дејан Георгиевски, својот настап на натпреварувањето во таеквондо ќе го започне на 27. јули и тоа на најтежок можен начин.

Противник на Дејан Георгиевски во првото коло ќе биде актуелниот светски шампион Рафаел Алба од Куба. Иако Алба е фаворит за хартија, самите кубански медиуми се претпазливи во најавите бидејќи нивниот пулен ќе се бори со човекот кој во квалификациите го елиминира актуелниот олимписки шампион.

И самиот Дејан пред тргнувањето за Токио најави дека не се грижи многу за противниците, свесен е дека во Токио ќе настапат најдобрите 16 таеквондисти  на светот во категоријата над 80 килограми. Борбата ќе се одржи на 27 јули, во периодот од 14 до 16 часот, а точниот термин ќе биде утврден накнадно.