Трет ден по ред, продолжија разорните поплави на Нов Зеланд, кои според властите, досега однеле четири животи.

Обилните дождови што ја зафатија земјата предизвикаа порои, лизгање на земјиштето и уништени патишта. Снимките ја покажуваат разорната моќ на поплавите, најтешки во земјата во последните децении.

Оукленд, најголемиот град во земјата со 1,6 милиони жители, и натаму е под вонредна состојба, откако во петокот го погодија невидени врнежи, предизвикувајќи поплави кои покрај милионската штета, оставија и илјадници луѓе без струја и вода.

„Мислев дека е торнадо. Само голем, голем удар. Погледнав низ прозорецот и не можев да видам ништо. Се враќав во кревет кога слушнав како децата врескаат. Се облековме и излеговме да погледнеме. беше тешко да се сфати што е тоа“, изјави жителот на Туранга, Дејв Хардинг.

На социјалните мрежи се појави и снимка од супермаркет во Оукленд, на која се гледа како купувачите се пробиваат во вода до половината низ целосно поплавениот маркет, додека струјата и натаму е вклучена.