Компанијата „Северен тек 2“, со седиште во Швајцарија, објави дека ги добила сите потребни дозволи од земјите низ чии територијални води минува истоимениот гасовод, вклучително и дозволата за работа на гасоводот во Данска.

Данската агенција за енергетика (ДЕА) објави дека издала лиценца за работа на таа компанија за гасоводот „Северен тек 2“ под одредени услови поврзани со безбедно работење.

– Пуштањето во употреба може да се изврши само откако барем една од двете цевки на гасоводот го мине тестот, добие потврда и кога ќе се исполнат релевантните услови содржани во градежната и оперативната дозвола”, информира данскиот регулатор.

Компанијата „Северен тек 2“, која е оператор на проектот на овој гасовод, наведува дека во моментот се разгледуваат различни можности за продолжување на поставување цевки.

До денес се завршени 93 проценти од гасоводот „Северен тек 2“ што од Русија минува преку дното на Балтичкото Море до Германија. Изградбата беше запрена на крајот на 2019 година, кога швајцарската компанија за поставување цевки „Олсис“ ја прекина работата поради санкции од САД.