Швеѓаните и тоа како држат до своите ритуали. Паузата за кафе, која се нарекува фика, обично е придружена со некаков колач, како што се полжави со цимет и често служи за ресетирање од работата.

И додека фика може да се практикува секој ден, среда е денот за „мала сабота“, односно за забава со пијалаци за да се „преполови неделата“, односно побрзо поминува чекањето на викендот.

Во Шведска, lillördag или „мала сабота“ е ден кога слугинките имале слободен ден бидејќи работеле во сабота, а во модерното време денот за одмор е заменет со ден за дружење со неколку пијалаци.

Во четврток, пак, ги вадат тавите за палачинки и го чистат свинското месо од жилите за чорба од жолт грашок, која тој ден често се наоѓа и на дневните менија во рестораните.

А во петок? Петок во последните 30 години во Шведска е ден за тортиљи, пишува „Би-би-си“.

Удобниот петок или fredagsmys е синоним за ритуалниот крај на работната недела, на кауч со убав оброк. Ако тортиљите не се во игра, тоа може да биде и плескавица или пица – главната цел е да ве исполнува со среќа, топлина и (најчесто) со калории.

Наместо да остануваат до доцна на работа во петок – или на долги ноќни излегувања, крајот на работната недела се означува со некоја серија или филм, евентуално со мрзливо дружење со пријателите или семејството под ќебе.

„Би-би-си“ пренесува дека 98 отсто од Швеѓаните уживаат во петочниот ритуал барем еднаш месечно и даваат предност на fredagsmys, наместо одење во кино, театар, клубови, вежбање, готвење, па дури и секс. Експертите коментираат дека таквата навика е добра за ослободување од стресот.

Меѓу најдобрите шведски ритуали, fredagsmys е нашиот омилен кога деновите стануваат пократки, а температурите сѐ пониски.