Колку тенкови има Србија е воена тајна, но судејќи според мапата што кружи на социјалните мрежи, Србија по Русија и Грција има најмногу тенкови во Европа, објави српски „Блиц”.

Весникот на својата веб-страница наведува дека на Твитер излегла мапа на Европа, на која е прикажано колку земји имаат тенкови на 100.000 жители.

Според мапата, Србија е на третото место на стариот континент, со 9,17 тенкови на 100.000 граѓани, пренесува „Блиц”. Русија е прва со 14,1 тенкови и Грција со 12,35 на 100.000 жители.

Ако се земе предвид најчестата информација дека Србија има седум милиони жители, тоа би требало дека значи дека Србија има 642 тенкови, објави весникот.

Министерството за одбрана, меѓутоа, негира дека Србија има 9,17 тенкови на 100,000 жители.

„Тоа не е точна информација, но не можеме да ви кажеме колку тенкови имаме”, велат од министерството.

Воениот аналитичар Александар Радиќ, сепак, посочува дека е точно дека Србија има најмногу тенкови во регионот, но тој исто вели во изјава за весникот дека армијата има 251 тенк.