Многупати досега сте се довеле во ситуација да испланирате ручек, а потоа планот да се промени во последен момент и веќе одмрзнатото месо, за да не го фрлите, повторно да го вратите во замрзнувач.

Иако тоа не е препорачливо, ако повторно се најдете во ваква ситуација, следете ги овие совети, со чија помош ќе го намалите ризикот од појава на бактерии што можат да го загрозат здравјето на целото семејство.

Веднаш штом почне одмрзнувањето на месото, почнува губењето на неговиот квалитетот. Кога повторно ќе го замрзнете, а потоа и по вторпат го одмрзнувате, тогаш во голема мера почнува развојот на штетни бактерии. Кај еднаш замрзнатото месо, а потоа и одмрзнато, комплетно се губат природните сокови. Тоа најмногу се случува со пилешкото месо. Затоа, ако неколкупати го одмрзнувате и го замрзнувате месото, немојте да очекувате да биде сочно.

Кога станува збор за одмрзнување, а потоа и за замрзнување на исто парче месо, многу важно е и на кој начин сте го одмрзнале. Доколку месото од замрзнувачот сте го префрлиле во фрижидерот и сте чекале да ја постигне посакуваната температура, ризикот од негово расипување ќе биде помал кога повторно ќе го замрзнете, а потоа и одмрзнете. Но, ако сте брзале и месото од замрзнувач сте се обиделе да го одмрзнете во микробранова, во тој случај нутриционистите препорачуваат да не го замрзнувате повторно.

Според нив, помала штета ќе направите доколку месото го фрлите отколку да го изедете и благодарение на брзиот развој на бактерии да си создадете низа здравствени проблеми.

Исто така, морате да имате на ум дека еднаш одмрзнатото, а потоа замрзнато месо, нема да можете да го чувате во замрзнувач подолго од две-три недели.