Дачиќ: Ситуацијата со Ѓоковиќ ќе остави последици врз односите меѓу Србија и Австралија
Претседателот на Собранието на Србија, Ивица Дачиќ изјави дека се што се случува со Новак Ѓоковиќ во Австралија ќе остави последици врз односите меѓу Србија и Австралија.
Дачиќ, како гостин на РТС, рече дека мала е веројатноста Австралија да и прифати какви било аргументи од страна на Србија кога станува збор за случајот со Новак Ѓоковиќ.
„Ова не е посебен и специфичен случај. Станува збор за политизирање на прашањето бидејќи стотици луѓе добија различни исклучоци. И ние политичарите бевме на различни настани ширум светот. Моравме да одиме во Британија. Целата делегација мораше да бара исклучоци, но тоа беше дел од политичката манифестација, па ОН ни го загарантираа тоа. Ако можат да влезат други тенисери, зошто некој така да се однесува кон Новак Ѓоковиќ?“, праша Дачиќ.
Тој посочи дека Ѓоковиќ дошол во Австралија по нивното одобрување и оцени дека однесувањето на австралиските власти е срамно.
Дачиќ потсети дека Новак има дипломатски пасош на Србија.
„Тој е тенисер број еден, свето име и легенда. Ова е необично, срамно, дрско“, истакна Дачиќ.
Тој додаде дека не верува дека премиерот на Австралија, Скот Морисон некогаш ќе дојде во Србија. „Не ни треба да доаѓа“, рече Дачиќ.