Д-р Костов: Испишавме 15 пациенти, а примивме 8 изминатото деноноќие
Директорот на ГОБ 8 Септември доктор Кристијан Костов, вели дека утринава од ковид центарот се испишани 15 пациенти чија клиничка слика била значително подобрена по третманот што го добиле во болницата.
-Синоќа имаме 8 приеми, а утринава испишавме 15 пациенти чија клиничка слика е добра. Починати се двајца изминатото деноноќие. Едната пациентка која почина беше донесена со бубрежна инсуфициенција но и позитивна на ковид. Вкупно имаме 24 респиратори во болницата, а од нив 6 се зафатени. Позитивни се околу 100 пациенти, а околу 80 на кислородна поддршка. Со персоналот, засега добро се држиме, бидејќи дел од оние што беа позитивни се негативизирани и вратени на работните места. Сите лекови ги имаме, дури и најскапите, како на пример ,,актемра”, лек што се дава на најтешките пациенти со цитокинска бура и пневмонија, и чини 100.000 денари од доза, дури и тој лек го имаме обезбедено преку донации, вели директорот.
Од истиот лек донација е обезбедена и за Инфективната клиника.