Од 11 март е забранет прием во градинките, на невакцинирани и нецелосно вакцинирани деца со ДиТеПер вакцината, а министерот за здравство Илир Демири денеска кажа дека на утрешниот состанокот на Комисијата за заразни болести треба да биде појасно за родителите и за вработените во градинките во Скопје дали забраната за прием на невакцинирани деца со ДиТеПер важи за тие што не се вакцинирани или и за тие што не ја примиле ревакцината.

– Ако дете на 2,5 години кое досега не било редовно вакцинирано, вчера ја примило третата доза на ДиТеПер вакцината, најрано што може да ја прими ревакцината е за шест месеци и тогаш да појде во градинка, вели д-р Александра Грозданова, претседателка на Националниот комитет за имунизација во вечерашното гостување на Топ тема на ТВ Телма.

Д-р Катерина Ставриќ од Клиниката за детски болести рече дека пандемијата со ковид-19 заврши пред една година, и родителите имаа доволно време да ги надоместат пропуштените дози на вакцини, а не како сега, приоритет е градинката и сите брзаат да ги вакцинираат децата.

На прашањето дали можеби треба да се промени одлуката во однос на тоа да се дозволи деца да одат во градинка без ревакцината, д-р Грозданова, д-р Ставриќ и д-р Злате Мехмедовиќ, кој е портпарол на Комисијата за заразни болести одговорија негативно.

„Ова е Календар за имунизација во цел свет, не е само кај нас“, кажа д-р Мехмедовиќ.