Американскиот континент плаќа висока цена за коронавирусот поради „неодговорните политики“ на некои челници како Доналд Трамп и Жаир Болсонаро, оцени висок службеник од Црвениот крст.

Бројни челници од тој континет се „неодговорни“, изјави претседателот на Меѓународната федерација на Црвениот крст и Црвената полумесечина, Франческо Рока и нагласи дека не се работи само за Бразил и САД.

„Американскиот континет плаќа највисока цена за своите политики кои не ги следат ставовите на научната заедница“, им рече тој на новинарите во текот на виртуелниот брифинг. „Вирусот е политизаран, тоа е смешно“, додаде тој.

САД со пандемијата се најзафатена земја на светот со најмногу починати, над 127.000 и најмногу заболени, повеќе од 2,6 милиони, а втор е Бразил со околу 60.000 смртни случаи и 1,4 милиони заразени.

Многу зафатени се и Перу, Чиле и Мексико

Бразилскиот претседател Жаир Болсонаро „ги потцени последиците од ковид и неговата земја ги трпи последиците“, рече Рока и потсети дека Болсонаро коронавирусот го спореди со „грипче“ и се бунеше против мерките за ограничување на движењето и затворањето на продавнциите. „Сега тие резултати се тука, пред очите на светот“, изјави Рока.

Тој потсети дека на американскиот континент многу се зафатени и Перу, Чиле и Мексико.

Во Латинска Америка и на Карибите се проценува дека за три месеци би можеле да починат повеќе од 400.000 луѓе ако не се преземат построги санитарни мерки, според Панамериканската здравствена организација (ОПС).

Во светот од пандемијата на ковид-19 починаа над 511.000 лица и има над 10,5 милиони случаи, и далеку е од крајот, неодамна предупреди СЗО.