Владата на Црна Гора соопшти дека Националното координационо тело за заразни болести (НКТ) одлучи денеска да го скрати работното време на угостителските и услужните објекти за два часа, а за исто време да ја продолжи забраната за напуштање на домовите за граѓаните.

Мерките ќе се применуваат од среда 25 ноември 2020 година на полноќ, до 8 декември до кога се продолжени и применетите мерки донесени на 13 ноември.

Досега забраната важеше од 21 до 05 часот, а сега е продолжена за уште два часа, односно важи од 19 часот.

Во соопштението се додава дека „НКТ, согледувајќи ја епидемиолошката ситуација од една страна, и економската од друга, овој пат донесе добри мерки со цел тие да ги опфатат граѓаните, економијата и претпријатијата без големи последици, а сепак да дадат очекувани резултати“.

Според податоците на Институтот за јавно здравје, во Црна Гора има активни 11.132 случаи на инфекција со коронавирус, додека од почетокот на годината се регистрирани 31.062.

Извор: Вијести.ме