Црн Дрим претворен во „тепих“ од трски: Надлежните на терен (ФОТО)
На социјалната мрежа Фејсбук, вчера осамнаа фотографии од реката Црн Дрим во Струга, која според објавата, била преполна со трски, реси и отпадоци.
Фотографиите наидоа на многубројни реакции кај граѓаните, кои коментираат дека состојбата во која се наоѓа реката е срамна. Сепак, набргу беше објавена и уште една фотографија која ги покажува надлежните на терен, како ја чистат реката.
Од општина Струга, во изјава за „Слободен печат“ велат дека за реката и за нејзиното чистење се задолжени од ХЕЦ „Црн Дрим“, која ја сочинуваат две брани и хидроелектрани, ХЕ “Шпилје” и ХЕ “Глобочица”.
На македонска територија, Црн Дрим е долг 56 километри, а во водите на реката живеат најразлични видови на риби, како на пример крапот, кленот, јагулата, мрената и други.