ЦИВИЛ ги прашува мразачите: Дали учевте од ИСИС или ИСИС учеше од вас?!
Невладината ЦИВИЛ јавно бара од политичките партии да ги запрат своите пропагандни ешалони и на своите поддржувачи и членови да им порачаат да престанат со ширење на омраза и со јавни закани со убиство на активисти.
– Повеќе од очигледна е координацијата на ваквите напади на социјалните мрежи и во дел од интернет медиумите. Тој напад започна за време на авторитарниот режим на Груевски, но трае со години и по неговиот пад. Крајно време е оваа омраза да престане, а одговорните за креирање и за поттикнување на омразата и насилството да се соочат со институциите на правдата, се наведува во соопштението на ЦИВИЛ.
По смртните закани со сечење глави, ЦИВИЛ смета дека е легитимно прашањето до членовите и поддржувачите на одредени, добро познати политички структури и до нивните раководства.
– Дали учевте од ИСИС или ИСИС учеше од вас?! – Нема оправдување за омразата што ја креирате и ја поттикнувате веќе со децении. Време е да одговарате за сите ваши злодела, криминал, сеење на омраза и повикување на политичко насилство, прашува и заклучува ЦИВИЛ.
ЦИВИЛ апелира до Јавното обвинителство и до МВР да поведат соодветни постапки за откривање на мрежите со кои се шири црна пропаганда преку лажни вести и екстремен говор на омразата.
– Денеска тоа е еден активист на ЦИВИЛ, но утре тоа може да биде цела заедница или и цела држава. Демократијата не подразбира хаос и самоволие, секој да се заканува секому, туку пред сè значи владеење на правото и почитување на човековите права и слободи. Крајно време е да се стави крај на дивеењето што го спроведуваат одредени центри на моќта во нашата земја. Креаторите се познати, мотивите се познати, последиците се видливи веќе со години. Време е да се преземат законски мерки, посочува ЦИВИЛ.