Централната банка на Кина објави дека и покрај краткорочните нарушувања на цените поради пандемијата на Ковид-19, во земјата не постојат основи за трајна инфлација и дефлација.

Кинеската економија остана стабилна, понудата и побарувачката генерално се во рамнотежа и затоа не постои закана од трајна инфлација и дефлација во земјата, се вели во извештајот на Централната банка за монетарната политика во првиот квартал.

Централната банка вети дека ќе го засили антицикличното прилагодување за поддршка на реалната економија, дека претпазливата монетарна политика ќе ја направи пофлексибилна и оти дополнително ќе ја продлабочи пазарно ориентираната реформа на каматната стапка и реформата на системот за формирање девизен курс на јуанот.

Индексот на потрошувачките цени, главната мерка на инфлацијата во Кина, во март се зголеми за 4,3 проценти во однос на минатата година, додека оваа бројка во февруари беше 5,2 и во јануари 5,4 проценти.