Царовска: Реформските процеси во образованието ги продолжуваме со силна поддршка на меѓународните партнери

Мила Царовска
Мила Царовска / Фото: Министерство за образование и наука

Министерката за образование и наука, Мила Царовска на денешниот онлајн состанок со Росана Дуџак, постојан координатор на ОН во Северна Македонија и претставници на неколку агенции од системот на ОН, укажа на реализацијата на новиот образовен модел кој има за цел секое дете да го постигне својот полн потенцијал.

– Од септември се воведува новиот концепт на учење во прво и четврто одделение, а за таа цел веќе се објавени огласите за изработка на материјали за учење и за илустрација на содржините. Во собраниска процедура е новиот Закон за учебници како и измените на Законот за наставници и стручни соработници, кои се дел од реформскиот пакет, истакна Царовска.

Министерката зборуваше и за унапредувањето на средното стручно образование. Таа рече дека преку процесот „Учи паметно, работи стручно”, Владата работи на подигнување на свеста за важноста на овој тип на образование.

– Со новиот конкурс за упис во средно образование во учебната 2021/2022 отворени се 97 дуални паралелки со зголемен обем на практична обука за 2.001 ученик. Подобрена е политиката на стипендирање, обезбеден е фонд за 2.200 стипендии за ученици од прва година, во вкупна вредност од околу 60 милиони денари, што е 10 кратно зголемен буџет во однос на минатата учебна година, нагласи министерката.

Таа наведе дека првпат од следната учебна година се воведува услугата образовна асистенција која е предуслов за обезбедување инклузивно образование и таа ќе се финансира преку Буџетот на МОН.

– За оваа услуга изготвени се нормативи и стандарди и дадени се описите на компетенциите и работните задачи, а во наредниот период ќе се организираат обуки за тренинг на тренери, кои понатаму ќе испорачаат обуки за идните образовни асистенти, рече Царовска.

Претставниците на ОН агенциите ја нагласија целосната посветеност на соработка во насока на поддршка и координација на развојните и реформски процеси кои се реализираат во Министерството за образование и наука.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот