Царовска на средба со СОНК: Синдикатот е наш важен партнер, заедно ќе ги спроведеме реформите

Министерката за образование и наука, Мила Царовска денеска имаше средба со претставници на Синдикатот за образование, наука и култура – СОНК и неговиот претседател Јаким Неделков, на која разговараа за претстојниот реформски процес во основното образование и за предложената нацрт-концепција.

Како што соопшти МОН, претставниците на СОНК и министерката се согласија дека реформите во образованието се нужни и навистина треба да се направат и потенцираа дека синдикатот е важен парнер во носењето на новата концепција и спроведувањето на реформите.

Министерката Царовска истакна дека овој процес требало да се случи уште пред една деценија и дека секој ден доцнење е на директна штета на учениците и на идните генерации.

Првпат во последната деценија во нашата држава, наведува МОН, во  образованието се прават реформи на исклучително транспарентен начин и со вклученост на сите страни и ќе се најде баланс во предлозите со цел да се направат реформи во најдобар интерес на децата.

– Со предложената концепција за секое дете во државата ќе бидат достапни позитивни и современи модели на учење кои во моментот може да си ги дозволат само дел од граѓаните, а наставниците ќе добијат слобода во организирањето на наставата, но и кариерен развој и можности за унапредување, рекла Царовска.

МОН додава дека реформата не се прави од денеска за утре, тука е резултат на широка консултација и на долгогодишни меѓународни и домашни анализи, но и ставови на наставници, родители и ученици.

Mинистерството за образование и наука ги продолжува дебатите и консултациите за Нацрт-концепцијата и соопштува дека во нив од самиот почеток се вклучени раководството на СОНК и регионалните претставништва на СОНК, експерти, професори и други засегнати страни и меѓународни организации и институции како УНИЦЕФ, Светска банка, УСАИД, амбасадите на Велика Британија и Швајцарија, Делегацијата на ЕУ.

– Сите изразија поддршка затоа што реформите треба да резултираат со квалитетно основно образование. Концепцијата е дел од Стратегијата на МОН за периодот 2018-2025 година, предвидена е со Законот за основно образование донесен пред околу една година и е дел од владината програма, наведува Министерство за образование и наука во соопштението.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот