Чупиќ: Имавме состанок со Самсоненко, до крајот на месецот ќе знаеме нешто повеќе!
Хрватското десно крило до крајот на сезоната ќе биде во Вардар, се надева и останатите, до крајот на месецот ќе се знае нешто повеќе…
Хрватското десно крило на „црвено-црните“ во интервјуто за „sportske.jutarnji.hr“ вели дека македонскиот и европски шампион се наоѓа во неверојатно тешка ситуација.
– Не се знае ништо. Имавме состанок со Сергеј Самсоненко и Михајло Михајловски, разговаравме. Кажано ни е до крајот на месецот ќе знаеме нешто повеќе. Што конкретно, не знаеме уште, но како и да е, јас сум тука до крајот на сезоната, мислам и останатите. Би сакал така и да остане, нештата да се стабилизираат, но засега навистина не знам ништо – вели Чупиќ.
Имаат поддршка, но ситуацијата не е ветувачка. Овие дена Иван Чупиќ живее без плата, но вели дека играчите не се откажуваат, како и верните навивачи на клубот, сè останато е политика.
-Политика која јас реално не ја разбирам. Би било штета сето ова да згасне…Не е идеално, но и ништо ново. Семејството е во ред, тоа е најважно. Секој има своја работа, едни со образование, други со ракомет. Се навикнаа, добро е – оптимист е Хрватот, играчот кој во 2017 и 2019 година ги постигнуваше клучните голови на Ф4 турнирот во Келн за европски титули на Вардар.
После заминувањето на Даинис Криштопанс (но и пред тоа), Чупиќ игра и како десен бек:
– Не е проблем, можам и на таа позиција да играм, не е тоа првпат. Ни се враќа Бразилецот Толедо кој осум месеци беше надвор од теренот. Мора да му се помогне на Толедо кој сеуште не е максимално подготвен, ќе помине 10 минути, а останатото јас заедно со Шишкарев помагаме колку што е можно.
Со триумфот на Мотор Запорожје (38:28), ракометарите на тренерот Алушовски обезбедија официјално пласман во осминафиналето од Лигата на шампионите.
До крајот на групната фаза остануваат уште две кола, гостувањето кај Порто и домашниот дуел против Монпеље, а во исто време ќе се дознае и противникот во елиминациските борби.
– Знаевме дека мораме да победиме, бидејќи со некои резултати го доведовме во прашање пласманот во вториот круг, а би било глупаво сето тоа да го упропастиме. Се собравме, добро го отворивме дуелот, а не ни очекувавме дека ќе биде толку убедливо – заврши десното крило на Вардар.