Членови на тим на СЗО во инспекција на Вухан: Се сомневаме во тврдењата дека ковид-19 „истекол“ од Институтот во Вухан
Член на тимот на Светската здравствена организација (СЗО) и заменик директор на Институтот „Пастер“ во Санкт Петербург, Владимир Дедков изнесе сомнежи за тврдењата дека коронавирусот „протекол“ од лабораторија на кинескиот Институт за вирологија во Вухан, пренесе Спутник.
Стручњаците на СЗО кои го истражуваат потеклото на коронавирусот во средата беа во посета на Институтот во Вухан. Дедков притоа истакна дека лабораторијата е многу добро опремена и истакна дека е „тешко да се помисли дека нешто протекло од таму“.
Во веста на Спутник, што ја пренесе и кинеската медиумска група ЦМГ се нагласува дека лабораторијата на Институтот во Вухан е под строги мерки на безбедност, поточно на БСЛ-4, највисоко безбедносно ниво во земјата.
Петер Дасак, исто така член на тимот на СЗО, рече дека добро ја познава лабораторијата и оти во неа се направени бројни достигнувања во областа на научното истражување. Тој додаде и дека некои луѓе сакале да ја извалкаат честа на лабораторијата и да ја дискредитираат што е, според него, „многу иронично“.