Коби Вајт е новиот миленик на навивачите на Чикаго Булс, 19-годишниот играч блесна со својата партија во победата на „биковите“ против Њујорк од 120:102.

Овој дебитант против Никси прво не ги реализираше првите пет шутеви од игра, а последната четвртина ја започна со само четири поени.

После тоа следуваше неговото шоу на паркетот, за 10 минути погоди дури седум тројки, на тој начин поставувајќи нов рекорд на клубот чија легенда е Мајкл Џордан.

– Овој играч е супер талент. Има неверојатна брзина, тоа треба да се почитува. Штом почне со реализирање на поени, тешко е да го запрете – рече тренерот на Њујорк, Дејвид Физдејл.

Коби Вајт како резервна беше најефикасен играч на натпреварот, го заврши мечот со 27 поени, два повеќе од клупскиот колега Зек Левин, а пет повеќе од првиот стрелец на Никс, Маркус Морис.