И во својот четврти натпревар македонската женска одбојкарска сениорска репрезентација претрпе пораз во Европската сребрена лига. Денеска нашата репрезентација загуби на гостувањето кај Естонија со 3:0 во сетови (25:22, 25:20, 25:16).

Првиот сет нашите одбојкарки добро го започнаа со водство од 3:0, па водеа со 5:3, но ривалот почна да ја топи својата негатива. Домаќинот го контролираше резултатот, стекна водство од 17:12, а потоа и највисоки „плус седум“ (21:14).

Вториот сет донесе најголема неизвесност, иако домаќинот имаше фуриозен старт од 7:2, а подоцна и 10:4. Македонските одбојкарки направија серија од 5:0 за само „минус еден“ на семафорот.

Во следниот период имавме и минимална позитива од 12:11 и 14:13. Се играше поен за поен, со доста израмнувања, а при 18:18 Естонките направија серија од 6:1 што беше клучно за зголемување на 2:0 во сетови.

Во третиот сет се држевме резултатски до 9:8, по што следуваше нова низа на поени на противникот за 13:8. Предноста на домашните одбојкарки постепено се зголемуваше, истата стана и „двоцифрена“ (23:13) по што беа решени сите дилеми околу победникот.

Антонија Баталаковска беше најефикасна во нашите редови со 12 поени, а на спротивната страна доминираше Силвиа Пертенс со 19.

Во рамките од групата „А“ води Естонија со 12 бодови, пред Австрија која има девет, Летонија три, а последна е Македонија без бодови. Избраничките на селекторот Стефан Пауновиќ следниот меч ќе го имаат на 14 јуни на гостински терен против селекцијата на Летонија.