Жител на селото Бајрамовци, Општина Центар Жупа, се води за исчезнат, откако неговото оддалечување од домот било пријавено во Одделението за внатрешни работи во Дебар.

– Вчера во 12:30 часот во ОВР Дебар, М.А. (69) од селото Бајрамовци, Општина Центар Жупа, пријавил дека неговиот син И.А. (40) се оддалечил од домот и не се вратил. Се преземаат мерки за негово пронаоѓање, изјави Стефан Димоски, портпарол на Секторот за внатрешни работи од Охрид.

Димоски, исто така, информира дека на подрачјето на општните Дебар и Центар Жупа, кое со својата активност ги покрива дебарското ОВР, не се регистрирани лица кои ја прекршиле забраната за движење, односно на ограничувањето на движење од 22 до 5 часот.

Според него во последното деноноќие полициските службеници не констатирале прекршок за неносење лична заштита на лицето.

– Во измнатите 24 часа не се регистрани вакви прекршоци, но во изминатите денови од овој месец издадени се 45 прекршочни платни налози за неносење заштитна маска. Во последното деноноќие во соработка со Државниот пазарен инспекторат извршиле се 28 контроли во угостителски и други објекти, додава Димоски.

Посочува дека вчера во периодот од 18 до 22 часот, полициските службеници санкционирале еден возач кој управувал патнички автомобил под дејство на алкохол. Истиот е исклучен од сообраќај и одземена му е возачката дозвола по што ќе следува соодветен поднесок.