Чешкиот претседател Земан има цироза на црниот дроб
Чешкиот претседател Милош Земан боледува од цироза на црниот дроб, изјави пред новинарите хирургот Павел Пафко од медицинскиот конзилиум, кој ја следи здравствената состојба на шефот на државата.
– Господинот претседател има хронично заболување на црниот дроб. Конкретно, цироза на црниот дроб. Оваа болест се карактеризира со тоа што може да се развива многу години без симптоми или со минимални симптоми, објасни хирургот.
Според Пафко, кој своевремено го оперирал првиот чешки претседател Вацлав Хавел, во стомакот на Земан била ставена цевка за хранење.
– Колку долго таа ќе остане таму, меѓу другото, зависи и од тоа колку претседателот строго ќе се придржува кон диетата која му ја препишале лекарите, објасни Пафко.
Тој додаде дека е премногу рано да се зборува за отпуштањето на Земан од Централната воена болница (ЦБМ), што може да потрае три до четири недели.
Земан вчера телефонски разговараше со се уште актуелниот премиер Андреј Бабиш, а денеска планира да контактира со Петр Фиала, кандидат за премиер од коалицијата „Заедно” на неколку либерални партии, кој победи на парламентарните избори. Првата седница на новиот парламентарен состав е закажана за 8 ноември.