Чешкиот министер Липавски очекува Македонија да ги донесе уставните измени

Министрите за надворешни работи на Чешка и на Македонија, Јан Липавски и Бујар Османи на денешната средба во Скопје ја истакнаа континуираната поддршка од Прага за патот на земјава кон Европската Унија, а беа потврдени и зајакнатите билатерални односи, како и економската соработка.

-Важен аспект на денешната посета е секако процесот на проширување на ЕУ и драго ми е што после првата меѓувладина конференција започнаа преговорите за пристапување на Северна Македонија во јули минатата година под наше претседавање со ЕУ. Се надевам земјата ќе продолжи со реформите и ќе ги донесе уставните измени. Го уверив мојот колега дека може да смета на континуирана чешка поддршка на патот кон ЕУ, рече Липавски на заедничката прес-конференција со Османи.

Тој нагласи дека Северна Македонија е пријател и НАТО сојузник на Чешка и оти се усогласува со заедничката надворешна и безбедносна политика, како што се цени и се забележува во сите извештаи.

– Очекуваме Северна Македонија да стане дел од ЕУ, а во меѓувреме и натаму ќе нудиме наша помош и соработка на тој пат. Пристапувањето кон ЕУ мора да биде врз база на заслуги, а билатералните спорови не треба да бидат причина за вето на зачленувањето на земјата во ЕУ. Јас сум тука да покажам и укажам дека може преку дијалог да се решат овие прашања и сигурен сум дека Бујар прави сѐ што може, истакна Липавски.

Османи по средбата кажа дека тој и неговиот чешки колега разговарале за билатералните односи што забележуваат нагорен тренд, надминувајќи 250 милиони евра трговска размена во 2022 година.

– Го информирав министерот за нашиот економски советник што е задолжен за земјите на Вишеградската група и очекувам да ги зајакнеме економските односи меѓу двете земји, не само од аспект на трговската размена туку и преку искористување на можните чешки директни инвестиции, рече Османи.

Тој, во својство на претседавач на ОБСЕ, на средбата ја отворил и темата за сериозното нарушување на европската безбедносна архитектура потикната од воената агресија на Русија врз Украина.

– Го претставив нашиот највисок приоритет како претседавач, а тоа е да запре натамошното човечко страдање, да ја ставиме во функција организацијата со теренските мисии за да ги ублажиме последиците од војната, но и да спречиме нови кризи и да обезбедиме поддршка за ранливите региони, следејќи го слоганот на нашето претседавање, а тој гласи „за луѓето се работи“, нагласи Османи.

Осврнувајќи се на билатералниот скриниг, тој на прес-конференцијата посочи дека според прелиминарните информации, земјата и институциите покажуваат високо ниво на подготвеност за спроведување на тој процес, што, како што истакна, се должи на силната политичка волја во Северна Македонија, се разбира и долгогодишното искуство коешто имаме.

Во однос на последните случувања со Бугарија, односно создадените тензии меѓу двете земји, Османи порача да се прекине тој циклус на на влошени односи и да се вратиме на позитивната агенда со цел продолжување таму каде што застанавме.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот