Претседателот на Чешка, Милош Земан вчера разговараше со кинескиот претседател Си Џинпинг за испорака на вакцини против ковид-19, објавија денеска чешките медиуми. Според соопштението на Амбасадата на Чешка во Пекинг, Кина одлучила „веднаш да одговори” на барањето.

Земан слична молба упати и до Русија за достава на вакцината „Спутник V“.

Досега само Унгарија од земјите-членки на Европска Унија (ЕУ) го имунизира населението со кинеската вакцина на „Синофарм“.

Од почетокот на пандемијата во Чешка, држава со 10,7 милиони жители, со ковид-19 се инфицирале речиси 1,3 милиони луѓе и регистрирани се над 20.900 смртни случаи.

Во Чешка досега граѓаните примиле 702.000 дози вакцини на „Фајзер“/„БајонТек“, на „Модерна“ и на „АстраЗенека“.

Чешка и Словачка, каде е зголемен бројот на новозаразени, ќе добијат дополнителни дози вакцина на „Фајзер“/„БајонТек“ од своите партнери во ЕУ.