Фудбалерите на Челси го совладаа Фулам со 2:0 во рамки на 34 коло во Премиер лигата и направија голем исчекор кон обезбедување на едно од првите четири места на табелата кои носат во Лигата на шампионите.

Од друга страна, екипата на Фулам само чудо може да ја спаси да не успадне од Премиер лигата.
Пред последните четири кола, Челси е четвртопласиран со 61 бод, два помалку од третиот Лестер, но има шест повеќе од петтиот Вест Хем кој пак има и натпревар помалку.

Фулам е на 18 место на табелата со 27 бодови, девет помалку од Њукасл и Барнли кои се пред него.
Натпреварот меѓу Челси и Фулам го одбележа Каи Хаверц кој ги даде двата гола за „сините“. Првиот гол го даде во 10. минута, додека конечниот резултат го постави во 49. минута по асистенцијата на Тимо Вернер.