Екипата на Челси ќе игра против Арсенал во финалето на ФА купот откако во полуфиналето го совлада Манчестер јунајтед со 3:1.
„Сините“ беа подобар противник во текот на целиот натпревар и сосема заслужено ќе игра во финалето. Фудбалерите на Челси подобро го отворија натпреварот и во првите 20-тина минути се играше на половината на „црвените ѓаволи“ но иницијативата не вроди со плод. Единствена закана беше шутот со глава на Алонсо во 15. минута, но не успеа да го совлада Де Хеа.

Конечно кон средината на полувремето Јунајтед се ослободи од притисокот, а најдобрата шанса ја имаа во 32. минута но шутот од слободен удар на Бруно Фернандеш го одбрани голманот на „сините“, Вили Кабаљеро.
Првото полувреме заврши со водство на Челси благодарение на голот на Жиру во 10. минута од судиското продолжение. Судијата Дин дури 11 минути го продолжи првото полувреме поради сударот со главите помеѓу соиграчите Ерик Баји и Хари Мегваер.

На стартот од второто полувреме Мејсон Маунт со одличен шут од 20-тина метри го совлада Давид де Хеа и го зголеми водството на Челси, додека победата ја завери Хари Мегваер со автоголот во 73. минута.
До крајот на натпреварот Манчестер јунајтед успеа само да го ублажи поразот преку Бруно Фернандеш кој го реализира пеналот.