Чекајќи на одговор од ДИК, Џафери ја прекина седницата

Собрание / Фото: МИА

По пауза поради одржување на локалните избори, Собранието денеска ја почна 51-та седница. На почетокот на седницата беше констатирано престанување на мандатите на пратениците кои на локалните избори беа избрани за градоначалници во општините во кои тие конкурираа.

Тоа се Костадин Костадинов од СДСМ, кој сега е градоначалник на Струмица, Тимчо Муцунски од ВМРО-ДПМНЕ, кој е нов градоначалник на Општина Аеродром. Дарко Костовски од ВМРО-ДПМНЕ кој стана градоначалник на Општина Бутел, Иван Јорданов од ВМРО-ДПМНЕ нов градоначалник на Штип, Кирил Пецаков од ВМРО-ДПМНЕ кој е избран за градоначалник Охрид и Биљал Касами од БЕСА, кој е градоначалник на Тетово.

За новите пратеници, чиј мандат треба да биде верификуван, на местото на оние досегашни пратеници кои заминуваат во локалната самоуправа, Собранието ќе почека Државната изборна комисија да го достави списокот на кандидатите кои доаѓаат на нивните места од редовите на избирачките листи од партиите на минатите избори.

Токму затоа претседателот на Собранието, Талат Џафери ја прекина седницата. Тој очекува до 14 часот да ги добијат списоците од ДИК, по што треба да продолжи седницата.

Останати уште неколку точки

Покрај верфикација на мандатите, на дневен ред на 51 седница се вкупно 14 точки, меѓу кои и Предлог-одлуката за испраќање на припадник на Армијата на Република Северна Македонија за учество во меѓународната операција на Европската Унија „АЛТЕА”, во Босна и Херцеговина, предлог-законите за Академија за судии и јавни обвинители, за адвокатура и за граѓанска одговорност за навреда и клевета, сите во прво читање.

Пратениците треба да дискутираат и за Дополнетиот предлог-закон за изменување и дополнување на Законот за трговија, во второ читање, Предлог-законот за дополнување на Законот за превоз на опасни материи во патниот и железничкиот сообраќај, по скратена постапка, Предлог-законот за изменување и дополнување на Кривичниот законик, во прво читање.

Собранието денеска ја почна 51 седница во Големата сала (купола). Пратениците во наредниот период ќе ги одржува седниците во оваа сала, бидејќи во моментов се изведуваат работи за опремување на пленарната сала во законодавниот дом со електронски систем за говорење, гласање и опрема за симултан превод.

Шест нови пратеници седнуваат во Собранието

Извор: МИА

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот