Владата на Република Северна Македонија соопшти дека на денешната осма седница донела одлука да се продолжи важноста на мерката за определување највисоки цени на основните прехранбени производи, како што се: леб, шеќер, брашно-тип 400, сончогледово масло за јадење, трајно млеко со масленост од 2,8%, 3,2% и 3,5%, свежо месо и сувомеснати производи, сирење и урда, ориз, јајца и тестенини.

Со оваа одлука највисоките цени на овие производи остануваат на нивото на редовните цени кои се применувале на 1 декември 2021 година, во трговијата на големо и трговијата на мало, при што се исклучуваат цените на попуст (акциски попуст/снижување/распродажба) кои важеле на 1 декември 2021 година.

Оваа интервентна мерка на пазарот, која започна да се применува од 6 декември 2021 година ќе продолжи да се применува до 28 февруари 2022 година, велат од Владата.

Владата на 4 декември минатата година донесе одлука со која ги замрзна цените на одредени основни прехранбени производи. Дополнително беше донесена и одлука да биде замрзната и цената и на оризот, тестенините и јајцата. Замрзнувањето на цените важи во трговијата на мало и на големо.

Од Владата тогаш најавија дека одлуката за определување највисоки цени на основни прехранбени производи може да биде продолжена и по 31 јануари 2022 година, ако тоа и натаму го бара состојбата на пазарот.