Цените на храната во светот пораснаа за 30 отсто

Кина ги повика граѓаните да подготват залихи од храна поради можни прекини во снабдувањето/ Фото: EPA-EFE/ALEX PLAVEVSKI

Поради војната во Украина, поскапеа житарките, нафтата, горивото и ѓубривата, поради што генералниот секретар на Обединетите нации Антонио Гутереш предупреди дека тоа ќе ја влоши прехранбената, енергетската и економската криза во сиромашните земји.

Обраќајќи се на состанокот за безбедност на храната организиран од американскиот државен секретар Ентони Блинкен, Гутереш апелираше до Русија да дозволи „извоз на житарки складирани во украинските пристаништа”.

Шефот на програмата за храна при ОН Дејвид Бизли, исто така, апелираше до рускиот претседател Владимир Путин да ги отвори украинските пристаништа. – Не се работи само за Украина, туку и за најсиромашните, кои се на работ на гладување, предупреди Бизли.

Блинкен рече дека мора да ја принудат Русија да дозволи извоз на храна преку соодветни коридори.

– Се проценува дека во моментов во Украина има 22 милиони тони житни култури во силоси, рече Блинкен.

Цените на храната на светскиот пазар се за 30 отсто повисоки од истиот период минатата година, покажуваат податоците на ОН, пренесува Би-би-си.

Видео на денот