Управата на Манчестер јунајтед кон крајот на минатата година му врачи отказ на Оле Гунар Солскјер и го донесе Ралф Рангник за нов менаџер кој треба да ја врати екипата во трката за трофеите, но состојбите во соблекувалната се далеку од идеални.

Не е тајна дека Кристијано Роналдо е незадоволен од постапките на Рангник кој неколку пати го извади од игра Португалецот, но сега англиските медиуми пишуваат дека и други фудбалери му се лути на менаџерот.

Рангник на своите фудбалери почнал да им праќа снимки и видео анализи како еден вид на домашна задача, а тие треба да ги прегледаат истите и да увидат каде грешеле.

Овој потег не им се допаднал на сите, па одреден  дел играчи му се налутиле на Германецот. Нивниот гнев е поголем и поради уште една одлука на Рангник, тренинзите сега се попладне, а не наутро како што беше претходно.

– Домашните задачи претставуваат снимки од околу два часа. Тоа се снимки со игрите на фудбалерите и во нив има совети како да напредуваат. Некои го прифатија тој потег, а некои воопшто не се импресионирани – изјави неименуван извор на клубот за весникот „Мирор“.

Овој потег на Рангник е сличен на тоа што во минатото го правеше Луис Ван Гал додека седеше на клупата на Јунајтед. Холанѓанецот на своите фудбалери им испраќаше мејлови со снимки на нивните грешки.