Бунт против Погба, соблекувалната на Реал не го сака во тимот
Желбата на Зинедин Зидан да го донесе својот сонародник најверојатно нема да му се исполни.
Пол Погба по секоја цена сака да го напушти Манчестер јунајтед и да се пресели во Реал Мадрид што е и најголема желба на тренерот Зинедин Зидан.
Зидан дури е подготвен да се откаже од талентираниот Мартин Одегард и од Хамес Родригез само за да го донесе својот сонародник на „Сантијаго Бернабеу“.
Но, претседателот Флорентино Перез е против оваа идеја, тој не сака да соработува со контроверзниот агент Мино Рајола чиј клиент е Погба, а исто така нема намера да му даде плата од 17 милиони евра колку што заработува во Манчестер јунајтед.
Сега Перез доби ветер во грбот според пишувањата на „Марка“, која тврди дека и соблекувалната на Реал Мадрид е против доаѓањето на францускиот репрезентативец.
Лидер на бунтот против Погба е капитенот Серхио Рамос кој смета дека Французинот ќе ја наруши атмосферата во клубот поради неговото однесување и карактер.
Фудбалерите на Реал Мадрид во време на кризата која го зафати клубот поради пандемијата на коронавирусот сметаат дека не треба да се купуваат ѕвезди во летниот преоден рок туку да се вратат позајмените фудбалери како Одегард и Ашраф Хакими со кои „кралевите“ повторно би биле едни од главните фаворити за титулите во Ла Лига и Лигата на шампионите.
Единствен фудбалер за кој немаат ништо против да пристигне ова лето и тоа за големи пари е Килијан Мбапе, но се чини дека ниту еден клуб не може да плати 200 милиони евра за неговите услуги.